وأمسي غريبا ولو كان بين الأهل والأوطان

اللهم سلمنا رمضان وسلم رمضان منا وتسلمه منا متقبلا..............رمضان كريم علي الجميع يارب وكل عام وحضراتكم طيبيين، أكتب لكم في ليلة رمضانية جميلة بعيدا عن الناس وبعيدا عن التليفزيون .....

وحيدة بس وحدة جميلة وحدة أشعر معها بالأنس .....أنس بالله بالملائكة من حولي أنس وسعادة يمكن لو حاولت أوصفها بالكلام الكلام هيظلمها..........

أحب أشارككم في دعاء قريته مؤخرا وسبحان الله حسيت إن الشيخ اللي كاتبه كأنه دخل جوايا وحس باحساسي........

يارب يارب يارب ،ارحم من ضاقت عليه الأكوان ولم تؤنسه الثقلان وقد أصبح مولعا حيران وأمسي غريبا ولو كان بين الأهل والأوطان ، مزعجا لا يأويه مكان، ولا يلهيه عن بثه وحزنه تغير الأزمان، مستوحش لا يؤنس قلبه إنس ولا جان.

رمضان 2008-رمضان 2010؟؟!!!!!!!

اليوم وبمناسبة اقتراب شهر رمضان قررت أن أفتح كشكولي القديم اللي كنت باكتب فيه مذكراتي زمان ..........إيه العلاقة؟ العلاقة بسيطة اللي مالوش ماضي مالوش مستقبل إلي جانب إن الواحد مابيحسش بالزمن وهو بيعدي لكن لما يقرا كلام كان كاتبه من سنين ....أحلام ،أفكار،خطط ......وعود وعد بها ربنا ونفسه ...ولسه ماعملش فيها حاجة .........بيتوجع ........والوجع ده ممكن يخليه يفوق ويصحي .......

لمايقرا  أمنية تمناها أو دعوة كان بيدعي بيها ربنا ويلاقي إنها تحققت يحمد ربنا ويشعر فعلا بقيمة النعمة لأن الواحد بينسي قد إيه كان نفسه في الحاجة بعد ما تتحقق......... وبعدين ده تطبيق عملي للمقولة الشهيرة اللي مش فاكرة من قائلها : ( اليوم هوالغد الذي وعدت نفسك أمس أن تنجز فيه الكثير من الأعمال).

المهم أنا لقيت بلاوي لقيت أحلام كتير وخطط مكتوبة بتاريخ 1 رمضان 2008.........ياااااااااااااااربي من سنتين .....وعود وأهداف وخطط.....أنا لغاية دلوقتي ما وصلتش لحاجة فيها.........

كانت أهدافي في رمضان 2008:

• مراجعة أول 10 أجزاء .
• الدعاء -العودة (كسر الحاجز)
• البحث عن الروح والقلب.
• انهاء دورة الجذب.
• سماع (الحب) للد/البوطي
• الأذكار.                                              (ده طبعا غير الأساسيات في رمضان ..التراويح وختمة التلاوة)

الحمد للله رب العالمين المراجعة والأذكار ودورة الجذب خلاص خلصتهم ..........لكن أهم حاجة وهي القلب والروح والدعاء لسه متكعبله فيهم يا موني .....إيه الخيبة دي ؟ ومحسيتش إن الوقت عدي وجري بيا ..........حاسة إني لسه كنت باكتب الكلام ده من يومين .....

لقيت دعاء حسيته قوي وعجبني ومحتاجة أتأمله مرة تانية وأعيش معاه شوية :

يارب أعطني القوة ويارب أقبل مني أن أوجه مذكراتي لك وحدك لأنك الوحيد الأحق بها وسامحني علي تخبطي ..أنا مش عارفة أنا رايحة فين لكن بجد في شئ بداخلي (همس) مصر علي إني في خطر ولابد أن أنقذ نفسي ، مش عارفة إزاي لكن بك هقدر .....ياربي لا تسكت هذا الهمس......عزني بعزك....

بالرغم من الحاجات الكتير اللي لسه معملتهاش لكن قراءتي لمذكراتي القديمة خلاني سعيدة ومش قادرة أبطل أأقول الحمد لله رب العالمين ......في حاجات كتير اتحسنت ....نعم في حاجات أكتر محتاجة تتحسن لكن أنا فعلا في نعمة كبيرة من ربنا .......

المهم .....أهدافي في رمضان 2010:

• طبعا في أساسيات ....استحضار النية في الصوم ،مساعدة ماما في المطبخ،التراويح،ختمة التلاوة، التهجد.
• استشعار الحمد ..........يعني كل يوم ربع ساعة تفكر في الحاجات اللي عندي وأنا عمري ما فكرت إنها نعمة وبتعامل معها علي إنها موجودة وخلاص......
• الذكر......الاستغفار،الصلاة علي النبي صلي الله عليه وسلم ،لا إله إلا الله
• الدعاء بالقلب فعلا دعاء المضطر مش دعاء الاستخسار وكأني حاطة رجل علي رجل ....لأ فوقي يا هانم واتعدلي.......
• خلي شعار رمضان ده ياااااااااااااااااااااااااااااارب ارزقني قلب جديد .....

ياااااااااااااارب جئت أشكو إليك مني وما فعلت بي فيارب أبدلني قلب جديد طاهر ونقي ولاتحرمني من رزقك ياكريم .......

ربنا يهديني ويهديكم...

كيف تجد قراء لمدونتك؟

واضح إن موضوع التدوين ده صعب جدا ......وأنا اللي كنت فاكرة إن كل مواطن من عامة الشعب أمثالي قادر علي التدويين ...............

أنا عارفة إني قلت إني باكتب لنفسي ومش عايزة حد يقرا لي ..... فعلا ده حقيقي لكن المشكلة إني طمعت ....وبني آدم مايملاش عينه غير التراب..........طمعت وفي ذات نفس اليوم كتبت بلوج تاني ..........بس قبل أي تعليق مش ظريف ما يتقال بجد بجد البلوج التاني كلام يستاهل مش عشان هو كلامي لأ لكن عشان هو مرتبط بأهم كتاب علي وجه الأرض وهو القرآن......وحاسة إن الكلام ده نعمة ربنا بعتها لي وحرام إني أكتمها وأنا بصراحة كتمتها كتيرلأن الكلام ده أنا كتباه من سنين........

المهم مطولش عليكم من غلبي دخلت علي جوجل وعملت بحث عن "كيف تجد قراء لمدونتك" طلعلي كلام كتير مفهمتوش ومعرفتش أعمل حاجة ...............حاسة إني غبية.......ما علينا هحاول أفهم ولغاية ما أفهم هأعتمد علي الدعاء و لو حد قرا الكلام ده ياريت ما يبخلش بالنصيحة ..........
وعموما فجأة ربنا رزقني بقارئة واحدة أول ماشفت أنها اشتركت في المدونة صدقوني كان هاين عليا ابعتلها جواب شكر وأوطي علي أيدها أبوسها إنها رفعت من روحي المعدنية ..... الحمد لله علي ما رزق.....

ربنا يهديني ويهديكم

ليه البلوج؟

أولا-السلام عليكم ورحمة الله وبركاته

ثانيا أنا مش عارفة عملت البلوج ده ليه.....يعني أنا ماليش في موضوع الكتابة ولا التدوين من أصله ..........ومش انسانة تحفة وفظيعة تكتب وتكسر الدنيا وستعطيك حكمة الكون ....... وبعدين دلوقتي كل مواطن عنده بلوج فمين هيقرا لي أنا يعني (زي كده حكمة زمان اللي ذاكر ذاكرمن زمان خدها مني حكمة اللي عمل بلوج عمل بلوج من زمااااااااااااااااااااااااااان)

لكن

أنا مخنوقة جدا جدا 

وحاسة إني عاملة زي أهل الكهف 

صحيت فجأة (بعد32 سنة علي هذا الكوكب) علي إن مليش صحاب 

حرام أظلم الناس معايا ..لي أصحاب ولكن لا أستطيع الكلام معهم .....بحبهم ويحبوني لكن في حاجز مش فاهماه لكن موجود.......حاسة إني مش قادرة أفتح قلبي بجد

وحاسة إني وحيييييييييييييييييييييييييييييدة جدا 

كأني من كوكب المريخ وفجأة لقيت نفسي علي كوكبكم الجميل اللذيذ كوكب الأرض

مجنونة ؟ يمكن! معاقة نفسيا ؟ إذ ربما ! مريضة بالتوحد علي كبر ؟ احتمال وهو فرصة أكسر الدنيا في حاجة وأبقي اكتشاف علمي مذهل....

أنا الحمد لله بحاول أكون متدينة كويس وبحاول أكون أقرب لربنا ويمكن في ناس حواليا بتعاملني علي إني عمر بن الخطاب...... واليومين دول بيرن في دماغي كلام سيدي بن عطاء السكندري في حكمه العطائية :

(متي أوحشك من خلقه، فاعلم أنه يريد أ يفتح لك باب الأنس به.)

يمكن تكون رسالة من ربنا ليا لكن أنا فعلا مش قادرة اليومين دول أدخل في المود ده .....حاسة إني وحشة جدا وبعيدة قوي عن ربنا فمش قادرة أكون بجحة وأأقول هستأنس بالله بدل الناس ...........

طبعا ده كلام فارغ لأني فعلا كل ما بحاول أعمل حاجة كويسة تقربني من ربنا بحس فعلا كأن في حضن دافي بيضمني ..............

المهم أنا قلت أكتب مذكراتي عشان أعرف أكلم نفسي براحتي ............فليه متكونش بلوج (ما هو بصراحة كل الناس دلوقتي يا أما بتكتب في بلوج أو جرنال) 

مبعرفش أكتب عربي فصحة ؟ أيه المشكلة ما هو العامية موضة برضه...علي الأقل خدها مني وعد عمري ما هاكتب فرانكوأراب.

أسلوبي مش حلو في الكتابة ؟ ياسيدي هدي نفسك ماأنا قلت لك إني هكتب أكلم نفسي ومطلبتش منك تقراها ...لو حد قراها وحب يقلي كلمة تساعدني يبقي ربنا يكرمه لكن أنا أساسا بكتب لنفسي 

أعتقد إن أنا كده انسانة صريحة جدا وعشان كده سميت الصفحة فتافيت مني لأن كل كلمة هتطلع مني هتكون فتفوتة صغيرة من جوايا من مشاعري أحلامي .....حياتي 

وأنا من زمان متعودة أكتب مذكراتي لكن توقفت من 3 سنوات ليه ؟ ماعرفش لكن غالبا كنت بهرب مني ومش عايزة أتكلم معايا.....المهم قلت يمكن موضوع البلوج ده يشجعني أتصالح مع نفسي وأرجع أكلمني تاني ........ولما أشوف الكلام مكتوب كده علي الشاشة أمامي أفهم أنا إيه اللي مضايقني.........

ربنا يهديني ويهديكم................